Yenə Yasamal. Yenə Şərifzadə küçəsi. Yenə də gecə-gündüz aparılan şübhəli tikinti işləri. Sual isə əvvəlki kimi açıq qalır: görəsən, bu qanunsuzluqlardan Bakı Şəhər İcra Hakimiyyətinin, Dövlət Şəhərsalma və Arxitektura Komitəsinin, FHN-in xəbəri varmı, yoxsa hamı yenə “görmədim-eşitmədim” siyasəti yürüdür?Abbas Mirzə Şərifzadə küçəsi ətrafında, Yasamal metrosunun yaxınlığında aparılan tikinti işləri sakinlərin ciddi narahatlığına səbəb olub. Ərazi onsuz da sıx yaşayış zonasıdır. Nəqliyyat problemi, piyada sıxlığı, kommunikasiya yüklənməsi artıq pik həddədir. Amma görünür ki, bəzi “işbazlar” üçün nə şəhərsalma normaları var, nə təhlükəsizlik qaydaları, nə də insanların rahatlığı.
Ən acınacaqlısı isə budur ki, belə tikintilər adətən həftəsonları, bayram günləri və nəzarətin zəiflədiyi vaxtlarda aparılır.Fimaz.tv xəbər verir ki, bu artıq Bakıda klassik sxemə çevrilib. Mediada və ictimai platformalarda Yasamal rayonu ilə bağlı qanunsuz tikinti iddiaları dəfələrlə gündəmə gəlib. Xüsusilə Şərifzadə küçəsində aparılan qanunsuz tikintilər barədə sakin şikayətləri yayılıb. Maraqlıdır, əgər ortada icazə varsa, niyə məlumat lövhəsi yoxdur? Niyə tikintinin hansı şirkət tərəfindən aparıldığı açıq göstərilmir? Niyə təhlükəsizlik tədbirləri gözə dəymir? Əgər icazə yoxdursa, bəs onda aidiyyəti qurumlar niyə susur?Yasamal Rayon İcra Hakimiyyətinin bu cür qanunsuz tikintilərə göz yumması sakinlərdə ciddi narazılıq yaradır. Şərifzadə küçəsində aparılan tikinti işləri açıq şəkildə hamının gözü qarşısında getsə də, ortada nə rəsmi açıqlama var, nə də real müdaxilə. Bu susqunluq cəmiyyətdə haqlı olaraq “kiminsə marağı qorunur” fikrini formalaşdırır. Əgər tikinti qanunsuzdursa, niyə dayandırılmır? Yox əgər qanunidirsə, o zaman sənədlər ictimaiyyətə təqdim olunmalıdır. Yasamal bu gün sanki nəzarətsiz tikinti poliqonuna çevrilib.Bu qədər şikayət, bu qədər narazılıq fonunda susmaq artıq səhlənkarlıq yox, məsuliyyətdən yayınmaq təsiri bağışlayır.
Adı çəkilən qurumların cavab haqqını tanıyırıq
Fimaz.tv
