ABŞ administrasiyası İranla əlaqəli bəzi sanksiyaların ləğv edilməsi barədə qərar qəbul edib.
Reuters-in məlumatına görə, söhbət İraqın Fly Baghdad aviaşirkəti, Iraq Express şirkəti və iki təyyarəyə tətbiq olunan sanksiyalardan gedir. ABŞ Maliyyə Nazirliyi bildirib ki, qərar həmin qurumların fəaliyyətində baş verən dəyişikliklər nəzərə alınaraq qəbul edilib və bu, Vaşinqtonun İrana qarşı ümumi siyasətinin dəyişməsi anlamına gəlmir.
Fly Baghdad və əlaqəli qurumlar 2024-cü ildə ABŞ tərəfindən İran İslam İnqilabı Keşikçiləri Korpusu (SEPAH) ilə əlaqədə olmaq ittihamı ilə sanksiyalar siyahısına salınmışdı.
Reuters-in məlumatına görə, ABŞ Maliyyə Nazirliyi son qərarı qəbul edərkən şirkətin davranışında əhəmiyyətli dəyişikliklərin baş verdiyini əsas götürüb. Bununla belə, bu dəyişikliklərin konkret nədən ibarət olduğu açıqlanmayıb.
ABŞ Maliyyə Nazirliyinin nümayəndəsi vurğulayıb ki, sözügedən qərar İran və ya SEPAH-a münasibətdə ABŞ siyasətinin yumşaldılması kimi qiymətləndirilməməlidir.
Qurum bildirib ki, sanksiyalar ləğv olunsa da, gələcəkdə zərurət yaranacağı təqdirdə onların yenidən tətbiq edilməsi mümkündür.
Reuters yazır ki, ABŞ rəsmiləri bu qərarın İranla davam edən diplomatik təmaslar və ya regional gərginliyin azaldılması istiqamətində aparılan müzakirələrlə bağlı olmadığını xüsusi qeyd ediblər.
Beləliklə, sanksiyaların ləğvi yalnız adı çəkilən şirkətlərin fəaliyyəti ilə bağlı aparılan qiymətləndirmənin nəticəsi kimi təqdim olunur.
