"İzvestiya" yazır ki, yeni müharibə ssenarisi üzərində işlənir, Ankaraya qarşı informasiya mühiti qəsdən gərginləşdirilir, ölkə “təhlükə mənbəyi” kimi təqdim olunur
Dünya İran ətrafında gərginliyin nisbətən səngiməsini izlədiyi bir vaxtda, NATO-nun cənub cinahında yeni və daha mürəkkəb qarşıdurma xəttinin formalaşdığı görünür. Bu dəfə diqqət mərkəzində Türkiyə dayanır. Regionda baş verən son proseslər göstərir ki, Ankara ətrafında hərbi-siyasi təzyiq artmaqdadır və bu prosesə Yunanıstan ilə yanaşı, İsrail də aktiv şəkildə cəlb olunur.
Musavat.com xəbər verir ki, bu barədə "İzvestiya" nəşri "Yeni Şafaq" a istinadən yazır.
"Türkiyənin “Yeni Şafak” nəşrinin iddialarına görə, Aralıq dənizində yeni müharibə ssenarisi üzərində işlənir. Nəşr qeyd edir ki, Ankaraya qarşı informasiya mühiti qəsdən gərginləşdirilir, ölkə “təhlükə mənbəyi” kimi təqdim olunur və Kipr, Egey dənizi, eləcə də Şərqi Aralıq dənizi üzərindən təzyiq artırılır. Bu isə Türkiyədə artan təhlükəsizlik narahatlıqlarını daha da dərinləşdirir. Mövcud vəziyyəti mürəkkəbləşdirən əsas amillərdən biri də Fransa-nın regiondakı fəallığının artmasıdır. Parisin Yunanıstanı “nüvə çətiri” altına ala biləcəyi ilə bağlı açıqlamaları və Kiprdə hərbi mövcudluğunu genişləndirmək planları Ankarada ciddi narazılıqla qarşılanıb. Rəsmi açıqlamalarda bu addımlar humanitar məqsədlərlə əsaslandırılsa da, ekspertlər bunu açıq şəkildə siyasi və hərbi mövqe nümayişi kimi qiymətləndirir" deyə, qeyd olunur.
O da bildirilir ki, İsrail və Yunanıstan arasında hərbi əməkdaşlıq son illərdə nəzərəçarpacaq dərəcədə dərinləşib: "Birgə təlimlər, kəşfiyyat məlumatlarının mübadiləsi və əməliyyat koordinasiyası artıq sistemli xarakter alıb. Məlumatlara görə, tərəflər Türkiyənin hava hücumundan müdafiə sistemlərini modelləşdirir və müxtəlif hücum ssenariləri üzərində işləyirlər. Hətta bəzi təhlillərdə Türkiyənin strateji obyektlərinin, o cümlədən hərbi bazalarının potensial hədəf kimi nəzərdən keçirildiyi vurğulanır. Bu proseslər fonunda Ankara da hərbi potensialını nümayiş etdirməyə çalışır. İstanbulda keçirilən SAHA 2026 sərgisində təqdim olunan “Yıldırımhan” ballistik raketi Türkiyənin strateji ambisiyalarının göstəricisi kimi qiymətləndirilir. Təxminən 6000 kilometr mənzilə malik olduğu bildirilən bu sistem Ankaranın qlobal hərbi güc balansında daha iddialı mövqe tutmaq niyyətindən xəbər verir. Bununla belə, ekspertlər hesab edir ki, bu cür addımlar daha çox siyasi mesaj və çəkindirmə aləti xarakteri daşıyır".
Regionda paralel olaraq yeni təhlükəsizlik blokunun formalaşdığı da müşahidə olunur. Yunanıstan, İsrail və Kipr hərbi əməkdaşlığı genişləndirərək ortaq müdafiə mexanizmləri üzərində işləyir. Bu çərçivədə Yunanıstan və Kiprin İsraildən uzaqmənzilli raket sistemləri alması planlaşdırılır ki, bu da Türkiyəyə qarşı hərbi balansın dəyişdirilməsi cəhdi kimi qiymətləndirilir.
Bütün bu proseslər daha geniş geosiyasi kontekstdə də izah olunur. Böyük Britaniya regionda baş verən gərginlikdən dolayı fayda əldə edə biləcək əsas oyunçulardan biri kimi göstərilir. Londonun Kiprdə hərbi bazalara malik olması və Aralıq dənizində enerji marşrutlarına marağı onun bu proseslərdə dolayı rol oynadığına dair ehtimalları gücləndirir. Bəzi analitiklərə görə, regionda gərginliyin artması enerji layihələrinin zəifləməsinə və nəqliyyat marşrutlarının hərbiləşməsinə səbəb ola bilər ki, bu da Böyük Britaniyanın təsir imkanlarını genişləndirir.
Bununla belə, mövcud vəziyyəti birbaşa müharibə astanası kimi qiymətləndirmək hələ tezdir. Daha real mənzərə regional güclər arasında strateji rəqabətin kəskinləşməsi, hərbi hazırlığın artması və qarşılıqlı etimadsızlığın dərinləşməsi ilə xarakterizə olunur. Lakin bütün bu faktorlar nəzərə alındıqda, istənilən lokal insidentin daha genişmiqyaslı qarşıdurmaya çevrilmə riski də istisna edilmir.
Beləliklə, Aralıq dənizi regionu getdikcə daha mürəkkəb və həssas geosiyasi məkan halına gəlir. Türkiyə ətrafında formalaşan yeni balans isə yaxın dövrdə beynəlxalq münasibətlərin əsas müzakirə mövzularından biri olaraq qalacaq.
