İsrailin "Dəmir Günbəz" raketdən müdafiə sistemi çərşənbə günü "Hizbullah" tərəfindən atılan 100 raketin yalnız yarısını ələ keçirə bilib.
Bu barədə "The New York Post" qəzeti İsrail Müdafiə Qüvvələrindəki (İDF) mənbəyə istinadən məlumat yayıb.
Mənbənin məlumatına görə, İsrail Müdafiə Qüvvələri bu hücuma cavab olaraq Livanda quru əməliyyatı hazırlayır.
Hələlik İsrailin nə qədər ziyan gördüyü və mümkün quru əməliyyatının miqyası barədə dəqiq məlumat yoxdur.
Qeyd edək ki, martın 2-də gecə saatlarında İsrailin şimal bölgəsi Livandan atəşə tutulub. Hücumun məsuliyyətini "Hizbullah" öz üzərinə götürərək bildirib ki, raketlər İranın ali lideri Əli Xameneinin qətli ilə bağlı cavab xarakteri daşıyıb. Bunun ardınca İsrail Hərbi Hava Qüvvələri Livan ərazisinə kütləvi zərbələr endirib.
Daha sonra İsrail Ordusunun Baş Qərargah rəisi Eyal Zamir "Hizbullah"a qarşı hücum əməliyyatının başladığını açıqlayıb və bunun "uzun günlər davam edə biləcəyini" bildirib. Martın 9-da isə İDF-in mətbuat xidməti İsrail qüvvələrinin Livanın cənubunda "Hizbullah"a qarşı məhdud, hədəfə yönəlik quru əməliyyatına başladığını açıqlayıb.
