ABŞ Prezidenti Donald Tramp federal hökumətin fəaliyyətini dayandıracağı və bunun çoxsaylı işçinin ixtisarına səbəb olacağını bəyan edib.
Bunu ABŞ prezidenti Donald Tramp Ağ Evdə keçirdiyi mətbuat konfransında jurnalistlərin suallarını cavablandırarkən deyib.
"Heç nə qaçılmaz deyil, yəqin ki, olacaq”, - Tramp bildirib.
Konqresin Büdcə Ofisi (CBO) hesab edir ki, federal hökumət maliyyə çatışmazlığı səbəbindən bağlanarsa, təxminən 750,000 işçi işdən çıxarıla bilər.
Hökumətin bağlanmasına səbəb isə Demokratlarla Respublikaçıların hələ də yeni maliyyə ilinin başlamasına bir neçə saat qalmış büdcə ilə bağlı razılığa gələ bilməməsidir.
ABŞ qanunlarına görə, Konqres oktyabrın 1-də başlayan və növbəti ilin sentyabrın 30-da başa çatan bütün maliyyə ili üçün büdcəni vaxtında təsdiq edə bilmirsə, buna qədər olan müddət müvəqqəti büdcələrlə əhatə olunmalıdır.
Büdcənin təsdiq edilə bilməyəcəyi dövrlərdə xərcləmə səlahiyyətini itirən federal hökumət, əsas xidmətlər istisna olmaqla, bütün fəaliyyəti dayandırmaq məcburiyyətində qalır.
Bu müddət ərzində qeyri-vacib xidmətlərdə çalışan dövlət işçiləri məcburi məzuniyyətdə olurlar. ABŞ ordusu, kəşfiyyat orqanları, dövlət xəstəxanalarında çalışan həkim və tibb bacıları, hava limanlarında və həbsxanalarda mühafizəçilər kimi dövlət işçiləri isə öz işlərinə davam edirlər. Ən qəribəsi də odur ki, "əsas işçilər" kimi təsnif edilən bu işçilər də, Konqres yeni büdcə qəbul edənə qədər maaşlarını ala bilmirlər.
