Xırdalan şəhərində yerləşən Amid Apartman sakinləri ciddi problemlərlə üz-üzədir. Xüsusi.Tv-yə müraciət edən vətəndaşların bildirdiyinə görə, iki il əvvəl bu binadan mənzil alsalar da, hələ də evlərinin kupçasını ala bilməyiblər. Onların sözlərinə görə, mülkiyyət sənədləri ilə bağlı bina sahibi Amid adlı şəxs müxtəlif bəhanələr gətirir və problemi həll etmək əvəzinə, sakinlərin haqlarını tapdalamağa davam edir.
Kupçasız mənzillər: İnsanlar hüquqsuz buraxılıb
Azərbaycan qanunvericiliyinə əsasən, mənzil alan hər bir vətəndaşın hüquqi mülkiyyət sənədi – kupçası olmalıdır. Lakin Amid Apartmanın sakinləri bu hüquqdan məhrum ediliblər. İllərdir binada yaşayan insanlar, öz evlərinin tam hüquqi sahibi olmadıqlarını anlayaraq narahatlıq keçirirlər. Çünki kupçasız mənzillərin satışı, vərəsəyə verilməsi və hətta məhkəmə çəkişmələrində müdafiə olunması çətinləşir.
Sakinlər Amid adlı binanın sahibindən bu sənədlərin verilməsini tələb etsələr də, hər dəfə müxtəlif bəhanələrlə qarşılaşırlar. Ən maraqlısı isə odur ki, Amid adlı şəxs pulunun olmadığını iddia edir, lakin buna baxmayaraq, hər gün binanın qarşısında müxtəlif tikinti işləri aparılır. Əgər həqiqətən maddi problemləri varsa, bu tikintilər hansı vəsaitlə həyata keçirilir?
Qanunsuz qazıntılar və təhlükə altında olan bina
Sakinlər bildirir ki, hal-hazırda binanın qarşısında qazıntı işləri aparılır. Halbuki bu ərazi əvvəllər avtomobil saxlama yeri kimi istifadə olunurdu. İndi isə orada nəqliyyatın saxlanması mümkün deyil, bu da sakinlərin gündəlik həyatına ciddi maneələr yaradır. Lakin əsas problem yalnız avtomobil dayanacağının ləğv olunması deyil – əsas təhlükə bu qazıntıların bina üçün yaratdığı riskdir.
Tikinti mütəxəssisləri bildirirlər ki, ardıcıl aparılan qazıntılar binanın əsaslı dayaqlarına təsir edə və nəticədə binanın çökməsinə səbəb ola bilər. Bu qədər qazıntının heç bir rəsmi icazə olmadan aparılması ehtimalı da ciddi narahatlıq doğurur. Əgər belədirsə, bu, həm sakinlərin təhlükəsizliyini, həm də şəhərsalma qaydalarını kobud şəkildə pozan bir haldır.
Dövlət qurumları məsələyə müdaxilə edəcəkmi?
Məsələ artıq ictimaiyyətin diqqət mərkəzinə düşüb. Sakinlər sual edirlər: Bu qanunsuz tikintilər və qazıntılar nə vaxta qədər davam edəcək? Dövlətin aidiyyəti qurumları – Abşeron Rayon İcra Hakimiyyəti, Fövqəladə Hallar Nazirliyi və Dövlət Şəhərsalma və Arxitektura Komitəsi bu məsələyə müdaxilə edəcəkmi?
Əgər vaxtında tədbir görülməzsə, həm sakinlər hüquqi haqlarından məhrum qalacaq, həm də bu bina ciddi təhlükə ilə üzləşə bilər. Hadisənin faciəyə çevrilməsini gözləmədən, aidiyyəti qurumlar təcili tədbirlər görməli və sakinlərin şikayətlərini araşdırmalıdır.
Xırdalanın Amid Apartmanı bir problem mənbəyinə çevrilmədən, ədalət bərpa olunacaqmı? Yoxsa bu qanunsuzluq davam edəcək? Gözləyirik!
