"Ukrayna özü Avropada qüvvələr balansını pozmaqla varlığını təhlükə altına atıb, müharibəni Rusiyaya uduzub. İndi onun gələcəyini başqa dövlətlər həll edəcək".
"Bu fikirləri "Patriota" "YouTube" kanalında çıxışı zamanı Macarıstanın Baş naziri Viktor Orban deyib.
"Ukrayna uduzdu, Rusiya bu müharibədə qalib gəldi. Yeganə sual budur ki, ukraynalıların arxasında dayanan Qərb fiqurları nə vaxt və hansı şəraitdə bunun baş verdiyini etiraf edəcəklər və bütün bunlardan nə çıxacaq", - hökumət başçısı bildirib.
Baş nazir xatırladıb ki, müəyyən məqama qədər Ukrayna mahiyyətcə Rusiya ilə Qərb arasında bufer rolunu oynayıb, lakin sonra NATO və Avropa İttifaqına daxil olmaq niyyətini bəyan edib və bununla da Avropada qüvvələr balansını pozub. Orban qeyd edib ki, Rusiya bunu öz milli təhlükəsizliyinə təhdid kimi görüb.
"Ukrayna hələ ona görə təslim olmayıb ki, avropalılar onu silah və pulla təmin edirlər. "Əgər bu olmasaydı, müharibə çoxdan bitəcəkdi", - baş nazir bildirib.
O vurğulayıb ki, hər şeyə rəğmən Aİ hələ də Ukraynaya hərbi dəstək verməyə hazırdır.
"Bir çox Avropa liderləri inanır ki, ukraynalılar israr etsələr, yekunda Moskvada rejim dəyişikliyinə nail ola biləcəklər. Mən bunu illüziya hesab edirəm", - Orban deyib.
O əmindir ki, Avropa İttifaqı münaqişəni davam etdirmək əvəzinə, ABŞ kimi Rusiya ilə dialoqu bərpa etməlidir. Baş nazirin sözlərinə görə, hazırda Ukrayna nizamlanması üzrə Rusiya Federasiyası və ABŞ tərəfindən aparılan danışıqların kənarında qalmalarına görə avropalıların özləri günahkardırlar.
