Məlum olduğu kimi, ABŞ Prezidenti Donald Tramp bir çox ölkələrdən ABŞ-yə məhsul idxalına qarşılıqlı tariflər elan edib. Azərbaycanın da yer aldığı siyahıdakı ölkələr üçün baza səviyyəsində gömrük rüsumları 10 faiz təşkil edəcək. Bununla belə, Çin üçün bu tarif 34, Tayvan üçün 23, Avropa İttifaqı üçün isə 20 faiz təyin edilib. Qərar aprelin 3-dən qüvvəyə minir.
“Qafqazinfo” xəbər verir ki, siyahıdakı ölkələrin bəzilərinin ABŞ liderinin bu addımına reaksiyası gecikməyib.
Belə ki, Avropa Komissiyasının rəhbəri Ursula von der Leyen bu tarifləri dünya iqtisadiyyatına əhəmiyyətli zərbə adlandırıb. Onun sözlərinə görə, Aİ ABŞ ilə danışıqlara hazırdır, lakin Vaşinqton etiraz edərsə, Brüssel cavab tədbirləri görəcək. Burada söhbətin hansı mümkün tədbirlərdən getdiyini isə Leyen açıqlamayıb:
“Avropanın bu fırtınadan yan keçmək üçün hər şeyi var. Aİ dünyada ən güclü daxili bazara sahibdir. ABŞ administrasiyasının fəaliyyətlərindən ən çox iqtisadiyyatı az inkişaf etmiş ölkələr zərər görəcək”.
ABŞ administrasiyasının qərarına etiraz ölkələrdən biri də Çin olub. Ölkənin Ticarət Nazirliyi Çinin maraq və hüquqlarının müdafiəsi üçün cavab tədbirləri görəcəyini vəd edib.
Nazirliyin məlumatında qeyd olunub ki, tariflərin artırılması bütün ölkələrin qanuni hüquqlarına ciddi zərbə vurur və birtərəfli qorxutma praktikasıdır:
“Tarix ABŞ-nin problemlərinin həlli üçün bu cür tədbirlərin effektiv olmadığını sübut edib. Ticarət müharibələrində qaliblər olmur və proteksionizm dalana doğru aparır”.
Eyni zamanda, Çin ABŞ-ni birtərəfli tarifləri ləğv etməyə və mübahisələri ticarət tərəfdaşları ilə bərabərhüquqlu dialoq yolu ilə həll etməyə çağırıb.
Yeni tarif qərarını tənqid edənlər arasında Braziliya da var və ölkə milli maraqlarını qorumaq niyyətində olduğunu ifadə edib.
Bununla belə, Argentina ABŞ-yə idxal olunacaq ölkə məhsullarına 10 faizlik tarif tətbiq edilməsi barədə qərarı müsbət qarşılayıb və bunu sərbəst ticarət haqqında sazişə ekvivalent kimi dəyərləndirib.
