“Regional təhsil idarələrinin yaradılmasında bir neçə məqsəd var”.
Bunu təhsil naziri Emin Əmrullayev ölkə Prezidentinin təhsillə bağlı sərəncamları barədə danışarkən bugünkü brifinqdə çıxışı zamanı deyib. O, sözügedən məqsədləri də sadalayıb:
“Birincisi çox sadədir ki, yerlərdə təhsilin idarə olunması müxtəlif qurum və təşkilatlar tərəfindən həyata keçirilirdi. Yəni bir yerdə, hansısa bölgədə məktəbəqədər təhsil müəssisələri bir formatda, ümumtəhsil məktəbləri başqa bir formatda, regionun maliyyələşməsi başqa bir qurum tərəfindən, yəni rayon təhsil şöbələri ərazi maliyyə hesablaşma mərkəzləri, məktəbəqədər təhsili idarə edən qurumlar, o cümlədən də metodik kabinetlər dördü bir-birindən əlaqəli şəkildə işləmirdi. Regional idarələrin yaranması bizə imkan verəcək ki, bu müəssisələr arasında təhsil fəaliyyətini vahid bir formata gətirək. İkinci məqsəd ondan ibarətdir ki, ümumiyyətlə, təhsildə idarəetmə və tənzimləmə funksiyalarını bir-birindən ayıraq. Bu gün hansısa bölgədə hansısa müəllimin saatından narazılığı varsa, o təhsil naziriliyinə müraciət edir ki, saatımı düzgün bölün. Başa düşməliyik ki, nazirlik müəllimlərin saatını bölməyə başlayırsa, onda heç vaxt bizim keyfiyyətli və əhəmiyyətli təhsilimiz olmayacaq. Saat bölgüsünü məktəb direktorları və ya regional qurumların rəhbərləri etməlidirlər. Hər bir qurumun öz işini düzgün və vaxtında görməsi olduqca vacibdir”.
