“Azərbaycan bütün hərbi bazalarını İsrailin ixtiyarına verib”... Bu sərsəm iddianı İranın dini rəhbərinin SEPAH-ın Şərqi Azərbaycan vilayətindəki nümayəndəliyinin rəhbəri Əbdülrəhim Nəcəfquluzadə Sərayi irəli sürüb. O, qeyd edib ki, Azərbaycan Respublikası bütün hərbi bazalarını İsrail və İran İslam Respublikasının digər düşmənlərinin ixtiyarına verib. Sərayi həmçinin Azərbaycanı müharibədə kimyəvi maddələrdən istifadə etməkdə də ittiham edib.
DİA.AZ_ın məlumatına görə, politoloq Rəşad Bayramov Bizimyol.info xəbər portalına açıqlamasında bildirib ki, İranda istər SEPAH-ın ayrı-ayrı rəsmiləri olsun, istər dövlətin digər qurumlarında təmsil olunan şəxslərin, deputatların, ayrı-ayrı regionlarda din xadimlərinin çıxışlarında bu cür sərsəm və cəfəng iddialara dəfəflərlə şahid olmuşuq.
“Daim Azərbaycanla bağlı tənqid və iftira bildirəndə mütləq şəkildə ora sionist rejim, İsrail, İslamın düşmənləri və sairə epitetlər qoşmağı onlar özləri üçün adi bir hala gətiriblər. Nəticə etibarı ilə, bugünlərdə haqqında danışılan bu sərsəm iddia bir müddət əvvəl Ermənistan tərəfindən səslənən iddiaların təkrarıdır...
Ermənistan Amerika Birləşmiş Ştatlarına və digər beynəlxalq təşkilatlara Azərbaycanı guya ki, fosfor bombasından istifadə etməsiylə bağlı cəfəng iddialar irəli sürmüşdü. İran da bu gün öz, dostu, qardaşı olan ermənilərin bu cür sərsəm iddialarını faktiki olaraq, təkrar etməklə məşğuldur.
Bir neçə gün əvvəl dini lider Xomeneyinin müşaviri, keçmiş xarici işlər naziri Vilayəti öz çıxışında güya Azərbaycanı sevdiklərini, Azərbaycanı qorumağa hazır olduqlarını dilə gətirərək, “Azərbaycan xalqı gözümüzün nurudur” demişdi. Bu günlərdə verilən bənzər sərsəm açıqlamalar isə, Vilayətinin ifadələrinin sadəcə və sadəcə səmimiyyətdən kənar deyilmiş sözlər olduğunu bir daha ortaya qoyur” - deyə politoloq bildirib. Onun sözlərinə görə, İran dəyişən deyil. Çünki İran Azərbaycanın İkinci Qarabağ savaşından sonra güclənməsi, regionda aktivləşməsindən olduqca çəkinir. İran özü üçün bunu böyük bir təhdid görür. İran yaxşı başa düşür ki, bu gün güclü Azərbaycan nəticə etibarilə, güneydəki soydaşlarımızın milli hərəkatının daha da inkişafına və möhkəmlənməsi xidmət edəcək. Bu baxımdan da İran narahatdır.
İran həm də Azərbaycan-Türkiyə münasibətlərindən, Türkiyənin regionda söz sahibinə çevrilməsindən, regionda aktiv siyasi iradə nümayiş etdirməsindən narahatdır. İran Zəngəzur dəhlizinin açılması ilə, Türk dünyasının birləşməsi və molla rejiminin bu Türk dünyasının əhatəsində qalmasının qorxusunu çəkir.
İran Azərbaycanın Qarabağ savaşında əldə etdiyi qələbədən sonra əlindən çıxan narkotik vasitələrinin daşınması üçün istifadə etdiyi yoldan məhrum olmasından narahatdır. Bu narahatçılığını da bu şəkildə iftiralarla, sərsəm-sərsəm bəyanatlarla dilə gətirir.
Politoloqun fikrincə, ikinci vacib səbəb də bugün cənubda yaşayan soydaşlarımızın öz azadlıqları, öz haqları, öz hüquqları uğrunda apardığı mübarizəyə mənfi don geyindirməkdir. İran belə başa düşür ki, bu gün Azərbaycanı bu vəya digər məsələlərdə haqsız olaraq tənqid etmək, Azərbaycana bu və digər məsələdə iftiralar atmaqla, bizi oradakı soydaşlarımıza dəstək verməkdən yayındıra bilər.
“Bütün bunlar təbii ki, İranı çıxılmaz vəziyyətə salıb. Baş verənləri İran son çırpıntıları kimi də dəyərləndirmək olar. Əli hər yerdən üzüldüyü üçün ortaya konkret bir iddia, bir fakt qoya bilmədiyi üçün belə, axmaq sərsəm iddia və bəyanatlarla çıxış edir. Əslində bu məsələdə İranın nə qədər haqsız olduğunu ortaya qoymağa bizim daha çox haqqımız çatır. Çünki ortada faktlar var. Ortada birinci Qarabağ savaşında İranın vasitəçiliyi ilə, Tehranda aparılan Azərbaycan-Ermənistan danışıqlarından və imzalanan atəşkəs sazişindən cəmi 6 saat sonra Şuşanı işğal olunması faktı var. Hansı ki, İran biganə yanaşıb. İran 30 illik işğal dövründə bir dəfə də olsun Ermənistana təcavüzkar kimi baxmadığı, onu Azərbaycan torpaqlarından çıxmağa dəvət etmədiyi faktdır.
Eyni zamanda İranın Birinci Qarabağ savaşı dövründə Ermənistan olduqca gülünc qiymətə benzin verməsi, onları ərzaqla və digər vasitələrlə təmin etməsi faktı, 30 illik işğal dövründə blokada olan Ermənistana qapılarını taybatay açıb, onları iqtisadi cəhətdən çökməsinin qarşısını alan yenə də İrandır” - deyə Rəşad Bayramov vurğulayıb. Onun sözlərinə görə, indiki dövrdə yenə də dünyada görünməmiş qiymətə Ermənistana qaz verən və qazın bu ildən etibarən limitini iki dəfə artıran yenə də İrandır. Bütün sadalananlar və sadalanmayan çox sayda faktlar var ki, İranın həm Azərbaycan düşmənçiliyini fakt olaraq, ortaya qoyur, həm də ümumiyyətlə İslam dəyərlərindən nə qədər uzaq olan bir ölkə olduğunu ortaya qoyur.
“Yaxşı olar ki, İran bu cür sərsəm iddialarla çıxış etməkdənsə, özünün son 30-35 illik tarixinə fikir versin” - deyə politoloq vurğulayıb.
