Ötən həftə bəzi "media" resurslarında AMEA Məhəmməd Füzuli adına Əlyazmalar İnstitutunu illərdir direktor akademik Teymur Kərimli deyil, filologiya elmləri doktoru Gülbəniz Babaxanlının idarə etməsi barədə absurd, heçbir əndazəyə sığmayan yazı dərc edildi. Həmin yazıda aydın şəkildə həm akademik Teymur Kərimli həm də Gülbəniz Babaxanlı açıq, qərəzli şəkildə hədəf seçilmişdi. Bu cızma-qara və şər böhtandan ibarət olan yazıya kiçik bir cavab vermək istəyirik. Birincisi AMEA Məhəmməd Füzuli adına Əlyazmalar İnstitutunu illərdir akademik Teymur Kərimli ciddi və nizam intizamla idarə edir. Məhəmməd Füzuli adına Əlyazmalar İnstitutununda həyata keçirilən işlər barəsində AMEA rəhbərliyi və elm adamları daha yaxşı bilgiyə sahibdirlər.
İkincisi Gülbəniz Babaxanlının AMEA Məhəmməd Füzuli adına Əlyazmalar İnstitutunu idarə etməsi barədə yazılanlar isə tam absurd və gülünc bir iddiadır. Çünki hər kəs yaxşı bilir ki, o Hüseyn Cavidin Ev Muzeyində işinin başındadır. Ömrünü Hüseyn Cavid irsinə, onun yaradıcılığına həsr edən Gülbəniz xanımın iş yükü ağırdır desək heçdə yanılmarıq.
Saxta elektron poçtla müxtəlif saytlara göndərilən məlumat tam şər böhtan əməlidir .
Bu gün Hüseyn Cavidin Ev Muzeyinin işçi heyyəti başda Gülbəniz Babaxanlı üç istiqamətdə işləyirlər. Bu üç istiqamət nədir? Birincisi və ən vacibi Cavidlərin həyat və yaradıcılığı ilə bağlı eksponatların toplanılması və lazımi səviyyədə qorunmasıdır. İkincisi həmin irsi tədqiq etmək, tədqiqatın nəticələrini elmi tədavülə buraxmaq və bu sahədə mütəxəssislər yetişdirməkdir. Üçüncüsü ölkədə və ölkə xaricində Hüseyn Cavid irsini təbliğ etmək. Sadaladığımız bu üç istiqamətlə bağlı Gülbəniz Babaxanlı və Hüseyn Cavidin Ev Muzeyinin işçi heyyəti gecə gündüz çiyin-çiyinə verib elmi fəaliyyətini uğurla davam etdirirlər.
Ancaq görünür sapı bizdən olanlar ədəbiyyatımızın günəşi Hüseyn Cavidi yenədə həzm edə bilmirlər. Belə olmasaydı Cavid yaradıcılığını, irsini, poeziyasını həm ölkədə həmdə xarici ölkələrdə tanıtdıran, təbliğatını aparan Gülbəniz Babaxanlıya şər böhtan dolu yazılar yazmazdılar. Amma ki, nə yazsalar da xeyri yoxdur. Çünki Dövlətimiz, onun rəhbərliyi, elm adamları və Azərbaycanı sevənlər, Hüseyn Cavidi sevənlər, oxuyanlar muzeyin direktorunu yaxşı tanıyır. Bu məsələ ilə bağlı institutun direktoru akademik Teymur Kərimliyə müraciət etdik. Onun münasibətini sizə təqdim edirik.
Hörmətli baş redaktor!
AMEA Məhəmməd Füzuli adına Əlyazmalar İnstitutu haqda sizə göndərilən anonim yazının həqiqətlə heç bir əlaqəsi olmadığına görə qətiyyətlə təkzib edirik!
Hörmətlə,
Direktor, akademik
Teymur Kərimli
